Bodegón 2

Obra paisaxística na que Pousa representa o traballo do campo, a sega do millo que están a recoller un grupo de tres persoas que seguindo un esquema piramidal ocupan no primeiro plano o centro da composición, mentres que nun segundo termo outra persoa regresa cunha patela na cabeza. O espazo compositivo da obra está formado pola sucesión de distintos planos: o primeiro, no cal está o grupo principal; o segundo, coa outra figura e o hórreo; e en último termo unha paisaxe de montaña na que se vislumbra un pequeno casarío. Estamos diante dunha obra chea de luminosidade, de cores intensas e trazos nerviosos e rápidos na que se pon de manifesto o tratamiento realista de Pousa da paisaxe, de débeda impresionista.

Xunto coa temática paisaxística que domina gran parte da produción de Pousa, aparecen outros temas de gusto popular. Neste caso, os protagonistas son dúas figuras: un pallaso e unha muller. Pousa xoga co contraste entre o debuxo de trazo negro e groso co que perfila as figuras, e as cores fortes coas que cubre o fondo e parte da vestimenta desas figuras; contraste tamén nas expresións dos rostros dos personaxes, o pallaso parece como asustado mentres que a muller aparece com airada, o cal aparece subraiado co xesto que realiza coa man. Asinado no ángulo inferior esquerdo.

Imaxe do traballo cotián nun pobo mariñeiro. En primeiro termo, vemos un home traballando coas redes e dúas mulleres con cestas na cabeza. Detrás, á dereita, aparece unha muller sentada e ao fondo, unha figura e as casas. Cara o lado esquerdo vemos unha barca e o mar. Vencellada ao quefacer impresionista, a pincelada é rápida e nerviosa, e resulta exultante en luminosidade e cor.

A paisaxe foi un dos xéneros maiormente cultivados por Pousa. A panorámica do río vén determinada pola peculiaridade atmosférica da brétema, que matiza as suaves entonacións dunha gama cromática baixa por medio dunha luz branquecina e fría, á vez que difumina toda a vista. A paisaxe convértese nun conxunto de sensacións. Asinado a. i. d. Comprado á galería Citania en 1981.