Bosquexo para o mural do "Café Moderno" de Pontevedra

José Otero Abeledo "Laxeiro"

Cando en 1973 o antigo Café Moderno de Pontevedra é adquirido pola Caixa Rural desa cidade, o mural "O manantial da vida" que Laxeiro realizara nese edificio entre 1940 e 1942 estaba en tan mal estado que o propio pintor decide facer unha copia sobre lenzo e situala no mesmo emprazamento ocultando a pintura mural orixinal. Este debuxo supón un bosquexo dese novo lenzo; trátase dunha figura dunha rapaza que centraría a obra do lenzo, que se compoñía de nenos que son faunos, anxos que son sátiros correndo, doncelas adolescentes que bailan semellando bacantes. No debuxo, Laxeiro presenta a unha rapaza cos ollos pechados que leva unha man á boca. Nel vemos as características do pintor: o gusto polas formas redondeadas, as figuras sólidas e rotundas froito da súa vinculación coa estética do románico. Gran mestre no debuxo, Laxeiro sérvese desta técnica tanto para crear o rostro da rapaza coma para delimitar os perfís e crear as sombras. "Estudio. Laxeiro. mural Pontevedra. 73". Comprado á Galería Citania en 1980.

Ficha técnica

Número de referencia: IBC0000743
Autoría: José Otero Abeledo "Laxeiro"
Título: Bosquexo para o mural do "Café Moderno" de Pontevedra
Temas: 
Figura de
Muller
Data: 1973
Técnicas: 
Debuxo
Dimensións: 
Alto: 51 cm Longo: 37 cm Sen marco Alto: 68 cm Longo: 54 cm Ancho: 5 cm
Materiais: 
Papel
Localización: Casa da Balconada
Obras relacionadas
laxeirosabio
Un sabio
José Otero Abeledo "Laxeiro"
1965

Irónica, ou polo menos ambigua, representación dun "sabio", coroado co tocado de bufo. Sobre o intenso vermello, a figura fragméntase organicamente, nunha representación de evidente influencia cubista; os grosos trazos negros e as fortes cores que delimitan estes, constitúen os elementos rexedores da obra, e conforman unha primitiva composición a modo de vitral. Sinatura e data no a.s.d.: "LAXEIRO/ BS-AS/ 1965". Inscrición no reverso: "LAXEIRO/ BS-AS/1965". Tamén no reverso ten unha tarxeta cos datos identificativos (autor, título, cronoloxía, dimensións, e procedencia da galería de Citanía). Comprado á Galería Citania en1981.

1965
abstraccionlaxeiro
Abstracción II
José Otero Abeledo "Laxeiro"
1970

Esta obra responde ás características iniciadas por Laxeiro na década dos 70. Nesta etapa, decántase pola riqueza do colorido; fronte as tonalidades terrosas de etapas anteriores, agora traballa con cores vivas destacando os azuis e laranxas. A obra é un abstracto que reflexa a liberdade do autor na súa execución, así como a depuración que oleva á liberar a pintura de toda carga anecdótica. Asinado e datado no a. s. e. "Laxeiro-70/Vigo" Comprado á Galería Citania en1980.

1970
rostrodemuller
Rostro de muller
José Otero Abeledo "Laxeiro"
1984

Neste gravado, Laxeiro amosa as súas capacidades para o debuxo; con el compón a obra na que sitúa o rostro dunha muller cortado á altura do busto sobre un fondo neutro, raiado, que lle serve para dar unha sensación de espazo. A liña configura a composición non só no fondo senón tamén para a representación das faccións do rostro, no que consegue transmitir a sensación de tranquilidade e serenidade. Asinado e datado a. i. d. Gravado na prancha (vemos a sinatura do revés) "Laxeiro 1984"

1984
mullerlaxeiro
Retrato de muller
José Otero Abeledo "Laxeiro"
1973

Neste debuxo a carbón, Laxeiro presenta un retrato frontal dunha muller cortado á altura do busto. Centra a atención na mirada do persoaxe que, aínda que parece ausente, mira cara a fóra, cara o espectador. A técnica é reflexo do estilo do autor, destaca a importancia do debuxo, definidor dos rasgos do rostro e a liña, de formas sinuosas e redondeadas coa que traza o perfil do rostro e do manto co que cobre a cabeza.

1973