O xénero da paisaxe, do bodegón e as escenas costumistas, sobre todo as obras con multitude de xente, como romarías ou este cadro titulado "Procesión", son constantes na produción do coruñés Fernández Sánchez. De temática relixiosa, represéntase a saída dun paso procesional de Semana Santa, que encabeza un grupo de penitentes encapuchados. O autor mostra a escena desde un punto de vista alto, como a vista de paxaro, o que permite ver a disposición da xente que acode á procesión formando un espazo coa forma da cruz latina dentro da cal transcorre o paso procesional. Estas escenas con multitude de xente permítenlle ao autor empregar unha pincelada de mancha cunha paleta cromática rica e variada. Asinado a. i. e.: "J. Fernández Sánchez" Inscrición no reverso: "LA PROCESIÓN".

Baseándose na influencia que a fotografía introduciu na pintura, Quintas Goyanes leva a cabo un retrato no que se ve esa influencia e dependencia entre os dous xéneros. Tecnicamente é unha obra que denota a importancia do debuxo; gran verismo e detallismo visible nas faccións do rostro e na vestimenta. Presenta o coñecido banqueiro Pedro Barrié de la Maza nunha estancia; o personaxe está posando, vai vestido coa toga e bonete vermello, propio dos estudos de Dereito e Económicas, e porta a medalla peitoral co escudo da USC. Trátase, polo tanto, dun retrato feito con motivo do seu investimento nesta Universidade como doutor Honoris Causa. No marco leva unha placa de metal que di: "Quintas Goyanes. Exmo. Sr. Barrié de la Maza Conde de Fenosa". Asinado e datado no ángulo inferior dereito: "Quintas Goyanes. 1970"

Xoán Pardiñas móvese nesta obra nunha liña que pasa dende a abstracción -sen chegar a abandonar nunca a figuración- ao expresionismo, pasando polo Pop Art. O título da obra "Violación" vén dado pola forma das figuras que centran a composición. Pardiñas xoga frecuentemente, como ocurre nesta obra, cos collages ou elementos en relevo, que lle confiren unha gran carga matérica. Chama a atención a paleta cromática vibrante que emprega, sobre todo os fucsias e malvas que o vincularían cun gusto Pop Art. Está presente ademais outra das súas características: o seu gusto por crear unha serie de personaxes-monstruos, que se moven entre formas figurativas e animais como se trata neste caso e a configuración do tema a través da cor e da estrutura matérica. Asinado no ángulo inferior esquerdo. Esta obra está actualmente retirada da exposición pública e almacenada por entender que o seu título pode resultar ofensivo.