Retrato de Aniceto Charro Arias, decano da Facultade de Farmacia entre 1961e1971. Na súa representación segue o esquema dos demais retratos de decanos da facultade. Sentado, vestido de traxe e cun brazo apoiado nunha mesa sobre a que vemos un microscopio, ao fondo vese unha pizarra con fórmulas químicas. O verismo no rostro, o gusto polas formas alongadas, a importancia do debuxo que crea a silueta da figura a base de liñas sinuosas, redondeadas, e delimita os obxectos que acompañan ao retratado, son características comúns en todos os retratos de Criado. A luz sérvelle para acentuar o rostro e xogar coas gamas cromáticas, neste caso a base de marróns e ocres predominantes na vestimenta e mobiliario. Asinado no a.i.e.: "Felipe Criado/1973"

Cláusulas da fundación do Colexio Maior de Fonseca, 3 de decembro de 1531.

Aínda que na súa produción abondan máis as obras de temática costumista e paisaxística, Clara F. Marín realiza o retrato de D. Enrique Raviña Rubira, decano da Facultade de Farmacia entre 1989 e 1995. Presenta o personaxe sentado nunha cadeira e apoiando os brazos nunha mesa, na que aparecen distintos aparellos de laboratorio, facendo referencia a súa carreira. O personaxe viste traxe e leva como atributo a medalla da Real Academia de Farmacia. Tecnicamente, a autora domina perfectamente o debuxo, visible no modelado da figura e no detallismo no rostro. Crea perfectamente a sensación de profundidade e a captación atmosférica e de luminosidade a través da luz que entra pola ventá do último termo. Asinado no ángulo inferior dereito: "Clara F. Marín. 1995"

Afastado da tradicional tipoloxía de retratos oficiais ou académicos, Felipe Criado presenta nesta obra o retrato de D. Francisco Bellot Rodríguez, decano da Facultade de Farmacia entre 1958 e 1961, no que se prescinde da representación de calquera tipo de elementos alusivos a súa condición de decano, xa que este non se fai representar nin co traxe académico, medallas honoríficas, nin libros que aludan a súa condición de intelectual; pola contra, Bellot Rodríguez preséntase vestido con traxe de chaqueta, sentado nunha cadeira de brazos e nun espazo aberto do que se ven ao fondo unhas árbores. O cadro, aínda que dun cromatismo contido baseado en grises e verdes, presenta unha luminosidade maior ca en obras anteriores de Criado, centrada sobre todo no rostro e nas mans. ao que se lle une a importancia do debuxo, de liñas sinuosas e envolventes visibles na concepción da figura ou da árbore do último termo. Asinado no lateral i.e. : "Felipe Criado/1975"

A serie de retratos que Felipe Criado realiza para a Universidade de Santiago afástase do concepto de retrato académico. Neste caso, trátase do que foi decano da Facultade de Farmacia, Jaime González Carrero (1934-1958). Este aparece en primeiro termo sentado nunha cadeira de brazos, xunto a unha mesa na que se sitúan dous libros, que farían alusión ao carácter académico. No fondo, nunha escena secundaria, Criado representa tres figuras vestidas coa bata branca tradicional farmacéutica que, de costas ao espectador, sitúanse diante dun laboratorio. Estilisticamente, o autor afástase nesta obra do cromatismo contido que caracterizaría a súa produción ata finais da década dos 70. Colorido nos azuis do traxe do retratado pero tamén nos rosas, verdes, malvas ou amarelos da cadeira e do fondo. Xoga coas sombras, pero estas non son escuras, senón de cores vivas de influencia expresionista; pero o debuxo tamén ten un papel fundamental xa que lle serve para delimitar a silueta das figuras, tanto do retratado coma das do último termo, no que vemos o gusto do autor por as liñas sinuosas, envolventes e os perfís redondeados. Asinado no ángulo inferior esquerdo "Felipe Criado 1972".

Gravado do retrato do director do Real Colexio de Farmacia San Carlos (1815-1821)

Retrato de Pablo Sanz Pedrero, decano da Facultade de Farmacia entre 1971 e 1974, o cal tamén foi reitor da Universidade de Santiago. Novamente, Criado afástase dos modelos tradicionais de retratos oficiais académicos, ao presentar a Sanz Pedrero ante un fondo indefinido, sentado e coas mans apoiándoas nas pernas. Non hai ningún elemento que nos permita asociar o retratado co seu rango de decano ou co mundo da Farmacia. Influenciado fortemente polo expresionismo, Criado toma deste estilo o uso que fan das sombras, que non son grises ou negras, senón de cores vivas que difumina. O autor repite ademais outras características persoais como o gusto polas figuras de carácter escultórico, polas formas alongadas, polas liñas sinuosas e redondeadas ou a importancia da luz no rostro do personaxe. Asinado no a..i.e. "Felipe Criado"

A pintura de paisaxe destacou dentro da produción de Baldomero Galofré Giménez xa desde a súa etapa de formación na Academia de Sant Jordi de Barcelona onde obtivo a primeira medalla da súa promoción na disciplina de paisaxe. Será durante a súa estadía italiana -dentro da cal realizou este cadro- cando senta as bases que caracterizarán esta temática. Alí empápase da luz que emanan dos seguidores da escola napolitana e dos pintores naturalistas da Campagna romana. Esta paisaxe ten certo aire melancólico, preséntanos unha vista na que vemos en primeiro termo un outeiro no que descansa un neno que pola aparencia semella un pastor e no fondo vemos un val. A paleta cromática é suave, baseada en grises, verdes e azuis. Tecnicamente constrúe os volumes por medio de toques rápidos de pasta densa, de influencia impresionista, á que habería que sumar a débeda de Mariano Fortuny. Asinado no ángulo inferior dereito "Galofre Roma"

Busto dun mozo vestido con pel de cordeiro, que sostén unha cruz; representación de San Xoán o Bautista. Asinado U. Noya 1930